Gapangaway ang dagat
Walay sama ang iyang hiyas
Naggilak-gilak ubos
Sa naglagiting nga ngisi sa adlaw
Gipaanod ta ang atong kamingaw
Adto sa mga balud
Nga mitukmod-tukmod sa atong
Gisakyang bangka
Tinuod layo-layo na ang atong naabot
Bisan gamay rag lutaw ang atong gisakyan
Bisan usa ray bugsay nga atong gikapaykapay
Bisan adunay buslot
Kitang duha nagpadayon gihapon
hangtod sa lawod
Kahibulungan kon giunsa nimo pagsanta
Ang mga balud nga sa gamayng lihok
Tingalig motidlom natong duha
Kahibulungan kon giunsa nimo paghadla
Ang mga nagsayaw-sayawng isda
Aron molingaw bisan sa kabalakang
Usa kanato maanod sa halayong dapit
Taob-taob na ra ba
Kusog-kusog sab ang tagubtob
Sa akong dughan kay lagi
Nagduha-duha ko kon
Kamao ba ko molangoy
Pananglit manghiwatid ang bangka
Greg fernandez
Back to Episodes Index