Kasajang sa ahong harana
Kaganihang kadlawon.
Gidujugan man unta sa tinagingting
Sa karaan kong gitara.
Ang ahong tingog nikujog

Man unta sa hinuros sa mabugnaw
Nga hangin aron maoy mopukaw
Sa nahinanok mong pagbati.
Apan wala jud nimo ablihi
Ang bintana sa lawak sulod sa imong

Dughan aron pasudlon
Bisag kadto na lang untang
Manipis nga bidlisiw sa adlaw.
Angkonon ko nga ako jabag,
Kay dili man ako anad.

Ug tingali naghasol lang ako
Sa imong maanindot nga damgo.
Apan mapasigarbohon lang
Gihapon ako kay kadtong huni nga
Ahong gipahinungod kanimo dili

Man hinimo ni Willy Garte O April
 "boy" Regino. Ug dili usab gikan
Ni Tom Jones o Matt Monroe, tungod
Kay orihinal kadto. Kini nasulat ko
pinaagi sa pag-sud-ong sa imong

Mga ug pahijom diin nahulma
Ang mga maanindot nga mga lirika
Sa ahong hunahuna , unja gidujugan sa musika
Nga kikumbo sulod sa dughan kong mamingaw.
Apan taas na ang adlaw, niinit na

Ang singot nga nitulo sa ,gikan sa ahong
agtang. Napagaw na lang kog kumanta
ug ang ahong mga tudlo nangagasgas
na lag kinaskas sa kuwerdas sa ahong sista,
wala ka gihapon nagpakita.