"Hello, this is a long distance call for Inday."
"Hello sir, wala ra ba si Inday, ninglakaw, mobalik ra kuno
to sila inig ka alas otso imedja. Mao nay ijahang tugon kung dunay manawag."
Ug dihay tingog sa usa ka linghud nga baje nipuli sa operator.
"Hello. Bii…"
"Bii pud."
"Dong bordmeyt ka ni Inday?"
"O, maam."
"Dong, nanay ni Inday, ingnaa na lang sija nga nitawag ko, ha."
"Ngano man diay unta maam?"
"Ambot katawagon lang jud ko. Kumusta man sija, wa ba sijay problema?"
"Okey ra man sija maam."
"Wa ba sija maghilak?"
"Ngano siing maghilak man, uy. Nagsige ra man gani tog tingsi."
"Aw, sige na lang dong. Palihug na lag ingon nga nanawag ko, ha."
"Sige maam, ingon ra ba to sija maam nga kung dunay manawag
ingnaon lang nga tawag og balik inig kaalas otso imedja."
"Sige na lang , dong. Daghang salamat, ha. Bye."
"Bye."
Taudtaud samtang gagitikgitik kos ahong gitara, niabot
si Inday nga nagt-shirt og puti nga loose kaajo unja supermubo
ang ijahang shorts. GAD! SUPERSEKSI! Pero naanad na kog tan-aw
ana nija. Kaniadto, nabag-uhan ko. IJARA! Bisag singkit ko, mulogat jud
ang ahong mata. Apan, nadugay, ganahan na man pud ko so… nisabot
na lang ko, uy. Nagbuwabuwa ang ijahang babag tsikatsika sa amohang
Baje pud nga bordmeyt. Sigpangatawa. Pareho sila kilay 2000.
Gapula ang wait. Apan, naputol ang ilahang tsika sa dihang nisulti ko-
"Day, nanawag ra ba ang imohang nanay."
"Ha! Unsay ingon?" Nitupad sija nako ug ang among bordmeyt
nitan-aw ni Inday dajon nisulod sa ijahang kuwarto.
"Wa man ka, so… ingnaon na lang kuno ka nga nanawag sija."
"Manawag kuno sijag balik?"
"Tingali… pero, wa man sii sija nagsulti."
Nihilum sija ug nagkantakanta ko. Nipijongpijong ko kay feel kaajo
Naho ang ahong kanta(One friend). Sija ningisig hilaw, gasud-ong
Naho. Ijahang gihikaphikap ang telepono sa ijahang kilid unja niduko. Ug pipila
ka oras ang nilabay, katugon na ko, wa gihapon sijay timik.
Niundang na lang kog kanta kay imbis mokanta, nanghuy-ab na man hinuon.
Nisaka kos taas bitbit ang ahong gitara.
"Bay , Matog na ka."
"O, uy, katugon na ko."
"Manawag pa kaha to si nanay?"
Ug ahong namatikdan nga nitibi si Inday samtang gahapuhap sa ijahang tijan.
 


Josua Cabrera
Back to Episodes Index