Dungan sa adlaw hinayhinayng mopadaplin
Sa mga mota nga katabon sa iyang mga mata.

Siya modupa usab, manghuy-ab, mobakod gikan
Sa iyang lantay aron katkaton

Ang nagkalayog nga mga lubi. Bugtong niyang
Mga abyan sa kanunay, ang sugong ug ang sanggot:

Ang saksi sa mga bun-og ug garas nga galinyalinya
Sa iyang lapalapa ug paa, kaniadto samtang kini

Lumoy ug hubo pa sa kubal. Kung ang punuan
Walay hakhak, dili kapugngang masamdan

Ang iyang dughan. Ang kakulba, dili masarang
Samtang siya magpalayo sa yuta. Siya mohangad, kay

Sa langit adunay gainusarang bituon sa banagbanag.
Kini gapangidhat, ug mopasayaw sa kasingkasing

Ni nong Erning. Apan inig katibuok sa adlaw, mopuli
Ang kahaw-ang sa dughan kay ang bituon mahanaw

Man lang. Ang kapait, kahadlok, ug kamingaw wala niya
Igsapayan, basta lang matigum niya sa sugong

Ang duga sa lubi ug matungogan aron modawat, mahimong
Tuba ug dili masuka. Sa ilawon sa panumduman ning yuta,

Kini tan-ugan hangtud igkasiete-Biyernes mahimong bahalina
Kini iyang iambit kanato, kita nga iyang mga higala.