Pasado alas dose, nagdungan tag paniudto,
Nanglingkod nga nag-inatbangay.
Steam rice ang atong gi-order.
Kini atong gikurawkuraw hangtud
Nagkasagulsagul na ang toppings ug ang kan-on.
Kini susama sa atong pagutingkay
sa kagahapon diin medyo halang,
morag nabisbisan og black pepper. Usahay,
aslum kay morag nasabwan og paksiw.
Ug usahay tab-ang ka daw kulang og toyo.
Basta, nagsagusagul ang lami, apan nindot handumon.
Kaniadto, lisod usapon ang kagahapon kay daw suka og iro.
Basa handurawon tungod sa mga luha,
apan kini ang nagpadanlog sa tutunlan
ngadto sa tiyan.
Kung ikaw ang akong kauban ning bugnawng
kan-anan sa Angelica, ato lang ikatawa
ang tanan. Gani wala lang nato alinggati
nga nahurot na diay ang steam rice.
Ang atong tiyan nabusog ug ang atong
hunahunag kasingkasing nanug-ab.
Josua Cabrera
Back to Episodes Index
